Pages

The Withered Rose | Lost Love, Poem

Jaane kal kya sama hoga,
Hum dosto me jaane kon kahan hoga…
Fir milna hua to milenge khwaabo me,
Jaise sukhe gulaab milte hain kitaabo me…

Someone very special said this to me on last day of my school. It’s been a few years but these words are etched so hard in my head and heart that I don’t seem like forgetting these. No matter how close you once were, time has the power to change things. Every incarnation promises its destruction one day or the other. Time has the ability to pull things apart irrespective of your liking.



Withered rose

Today I have one of those priced moments that can change your mood. The moment when you find a withered, dry, wan, blackened rose in a book, you begin to sense loss, the agony, pain, grief. You wish if you could turn back the tide, roll back the clock and go back to those days when the rose was blossoming in color of life and love.
At the moment of writing the weather in Delhi is absolutely same as depicted in the poem. Enjoy the rain, the drizzle, and the breeze.


Band kamre me baitha,
Mai us khidki ke baahar dekhta hun..
Subhah ko shaam,
Shaam ko subhah me badalte hue dekhta hun..

Aaj sama kuch alag hai,
Jaise khuda ke dil me ik lalak hai..
Zameen ko mehkaane ki,
Suraj ko baadalo me chhupaane ki..

Baadalo ka aaya ek karwaan,
Andhiyaare me jaise kho gya jahan...
Thandi thandi hawaayein behne lagi,
Aasma se motio ki barsaat hone lagi..

Ek boond ki khatir maine haath badhaaya,
Khuda mehrbaan tha, ek nahi maine saikdo ka uphaaar paaya..
Muthi me maine unhe sametna chaaha,
Ek pal me hi maine sab kuch gavaaya..

Ye zindagi hai,
Yahaan saans se pehle saath chhoot jaata hai..
Vaada janmo ka,
Kisi pal toot jaata hai..

Meethi baarish me achanak ik toofan aaya,
Ek sunn se zehn se yaado ka sailaab laaya..
Shaant padi kitaab tab jagne lagi,
Jab zindgi ki raftaar se hawaaye panne palatne lagi..

welcome rains
Achanak ek jagah ruk gai kuch aise,
Jaise kehna chaahti ho kuch mujse..
Daudte waqt ke sailaab se jhagad raha tha,
Ek sukha gulaab, jaise aandhio se lad raha tha..

Waqt ke panno tale dafn,
Berang beadab pada tha..
Par bezubaan aaj akad kar khada tha,
Kuchh sunaane ko zidd par ada tha..

Ek daastaan jo laakh bhulaaye bhulai na gai,
Wo meethi yaadein, jo kadwe sach me ghul gai..
Wo kaanch ke sapno ka ghar, jo haqeeqat ki thokar se toot gya,
Wo ummeedo ka falsafa, jise padkar khuda humse rooth gya…

Haan is rooh-e-patthar ko bhi kabhi kisi se pyar tha,
Kisi ki arzoo thi, Kisi par khud se zyaada aetbaar tha..
In maayus aankho me kabhi kisi ka aks tha,
Haan zindgi se pyaara, koi shaks tha..

Kasme vaade the ya na the,
Wo iraade the ya na the..
Ek ehsaas tha,
Jo dil ke paas tha..

Haan kabhi mujse bhi kisi ne pyaar kia tha,
Is begaane ka bhi kisi ne intezaar kia tha..
Wo din jab gulaabo se zyaada mehek thi zindgi me,
Aaj bhatakta hai dil unhi ki tishnagi me..

Sapne to bus neend bhar jeete hain,
Fir toot jaate hain..
Chaandni ke to chand pal hote hain,
Fir kohre me sab doob jaate hain..

Zindgi kyu jeete hain jo aakhir maut aani hai,
Pyar kyu karte hain jab ruswai aani hai..
Wo judai ka pal aaj bhi yaad aata hai,
Dil reh rehkar tadap sa jaata hai..

Na kuch keh sake wo,
Na kuch keh paaye hum..
Behte aansuo ko,
Ek pal na rok paaye hum..

Ik gulaab me apni rooh saunp aaye hum,
Ek gulaab me unki dhadkan sanjo laaye hum..
Juda hua tha koi apna mujhse kabhi,
Jiski yaad me aaj tak dil rota hai har ghadi..

Is sookhe gulaab ko meri aankho ki nami dedo,
Ise do pal ki zindgi dedo..
Badle me mere kal ki saari umang lelo,
Par us gulaab ko zara sa rang dedo..


Share this: